Uttanlands

Google Plus letur aftur í apríl

Enn ein trygdarleki funnin í miðlinum, sum skuldi taka upp avbjóðingina við Facebook

2018-12-11 07:28 Author image
Ingi Samuelsen
placeholder

Google fer at lata sosiala netverkið, Google Plus, aftur í apríl 2019 í staðin fyri, sum ætlað í august. Orsøkin er enn ein leki í dataskipanini, upplýsir felagið, sambært CNN.

Nýggjasti trygdarlekin merkir, at mennarar av appum í fleiri dagar í november høvdu møguleika at fáa atgongd til privatar upplýsingar hjá 52,5 milliónum brúkarum.

Google varnaðist trygdarbrekið í sambandi við eina kanning av trygdini, og kundi tetta lekan beinanvegin.

Í oktober upplýsti Google, at tey í mars høvdu ’varnast og beinanvegin tett’ ein dátuleka, sum rakti eina hálva millión privatar brúkarar. Í tí sambandinum upplýsti felagið, at Google Plus fór at verða latið aftur í august 2019.

Netverkið varð ætlað sum ein avbjóðari til Facebook, men sambært fleiri miðlum, er tað ongantíð eydnast at koma í nær námind at gerast eins væl umtókt og kappingarneytin.

Google Plus byrjaði í juni 2011 sum ein fundarstaður fyri persónar, felagsskapir og fyritøkur. 

placeholder
placeholder