Gripur av Føringinum handaður Sands kommunu

Tá hátíðarløtan var heima á Sandi 28. september fyri minnismerkinum yvir hendingina tá 10 mannafarið Føringurin bjargaði tveimum bátsmanningum í himmalsins ódnarveðri 14. mars 1940, segði borgarstjórin nøkur orð, millum annað, at einki var eftir av 10 mannafarinum Føringinum, uttan navnabrettið, sum er í varðveitslu hjá ungmannafelagnum Virkinum.

Les eisini: Tað kundi verið ein feigdardagur, men teir bóru boð í bý

Tá hátíðarløtan var komin at enda, kom mentamaðurin Edvard í Skorini Joensen í Sandavági til borgarstjóran og greiddi frá, at hann hevði ein toll og ein borðsskeyta av Føringinum í varðveitslu. Edvard greiddi frá, at morbróðir hansara, Kai Nolsøe, hevði bjargað tollinum og borðsskeytanum beint áðrenn Føringurin bleiv burturbeindur.

- Sum tann hampa- og skilamaður Edvard er, bjóðaði hann Sands kommunu tollin og borðskeytan, skrivar Heri Sverrason, borgarstjóri, á Facebookvanganum hjá Sands kommunu.

Edvard í Skorini hevur síðan verið á Sandi og handað tollin og borðskeytan, sum nú hanga nú í prýðiligu hølunum hjá Sands kommunu.