Uttanlands

Hong Kong: Yvir eitt ár í fongsul fyri at luttaka í mótmælistiltøkum

Ríkmaðurin og stríðsmaðurin Jimmy Lai fekk fríggjadagin 14 mánaðar fongsulsrevsing fyri at hava luttikið í tveimum mótmælistiltøkum í 2019

Jimmy Lai varð saman við fleiri øðrum stríðsfólkum  dømdur fyri brot á trygdarlógina í Hong Kong (Mynd: EPA)

Jimmy Lai varð saman við fleiri øðrum stríðsfólkum dømdur fyri brot á trygdarlógina í Hong Kong (Mynd: EPA)

2021-04-17 11:12 Author image
Alda Nielsdóttir
placeholder

Ríkmaðurin Jimmy Lai, ein av mest týðandi fólkaræðisstríðsmonnunum í Hong Kong, fekk fríggjadagin 14 mánaðar fongsulsrevsing fyri at hava luttikið í mótmælistiltøkum móti stýrinum í Beijing.

73 ára gamli Jimmy Lai eigur miðilin Daily Apple, og hann hevur verið ein av størstu kritikarunum hjá myndugleikunum í Hong Kong.

Tað var fyrr í hesum mánaðinum, at ríkmaðurin varð funnin sekur í at hava luttikið í teimum báðum mótmælistiltøkunum, sum vóru í august 2019. Jimmy Lai hevur ikki fingið slíkan dóm áður, skrivar Jyllands-Posten.

Fríggjadagin vórðu fleiri onnur stríðsfólk eisini revsaði fyri at hava luttikið í mótmælunum ávikavíst 18. og 31. august 2019.

Stríðsfólkini eru m.a. dømd fyri at hava brotið umstríddu trygdarlógina hjá Hong Kong, sum kom í gildi í juni 2020, og sum lond í vesturheiminum ferð eftir ferð hava funnist at.

Mannarættindafelagsskapir halda, at trygdarlógin tekur talufrælsið og onnur grundleggjandi frælsisrættindi frá borgarunum í Hong Kong.

placeholder
placeholder