Jarðarferðin hjá Yahya Hassan verður týsdagin

Danski yrkjarin Yahya Hassan, sum varð funnin deyður í vikuni, skal eftir ætlan jarðast á muslimska økinum á Vestre Kirkegard í Aarhus týsdagin.

Les eisini: Yahya Hassan deyður

Tað upplýsir Abu Khaleed, imamur og gubbi mammu Yahya Hassan, fyri B.T. Orsakað av korona, er tó ógreitt, hvussu hetta fer fram.

Tað var hósdagin, at tíðindini bórust um, at 24 ára gamli yrkjarin var deyður. Sambært Ritzau, var tað mamman, sum fann hann í íbúð hansara í vestara partinum av Aarhus.

Løgreglan í Eysturjútlandi vil ikki vátta tíðindini, men sagt verður, at ein persónur varð funnin deyður í Aarhus í vikuni, og at tey í løtuni eru í ferð við at kanna málið nærri. Enn er ógreitt, hvat deyðsorsøkin er, men í løtuni er einki sum bendir á, at talan hevur verið um eitt brotsverk.

Yahya Hassan gjørdist kendur, tá hann í 2013 gav út sítt fyrsta yrkingasavn við heitinum "Yahya Hassan". Í 2019 kom so enn eitt yrkingasavn, "Yahya Hassan 2". Århusianski yrkjarin hevur fingið fleiri virðislønir fyri útgávur sínar.