Kim Jong-un farin til Kina á toppfund

Norðurkoreanski leiðarin, Kim Jong-un, er farin til Kina har hann skal fundast við Xi Jinping, forseta.

Tað boðar norðurkoreanski statsmiðilin, KCNA, frá sambært fleiri altjóða tíðindastovum.

Kim Jong-un byrjaði ferðina til Beijing longu í gjár. Sambært KCNA er kona hansara og ein røð av embætismonnum við á ferðini.

Miðlar í Suðurkorea skrivaðu í gjár, at Kim Jong-un ferðast í einum serbygdum toki. Tíðindini kundu í gjár tó ikki váttast, hvørki úr Norðurkorea ella Kina. Vanliga ger Norðurkorea ikki viðmerkingar til slíkar fundir fyrr enn eftir at teir eru hildnir, skrivar Ritzau.

Kinesiska tíðindastovan váttar í dag, at ein fundur er avtalaður millum Kim Jong-un og Xi Jinping. Einki verður tó sagt um dagsskránna fyri fundin.

Sambært suðurkoreanskum miðlum fór Kim Jong-un tvørtur um markið til Kina í gjárkvøldið. Hetta hendi nærhendis býin Dandong.

Tokið væntaðist at vera í Beijing um middagsleitið í dag, lokala tíð – tað var um tvey tíðina í nátt, okkara tíð.

Hetta er fjórðu ferð at hesir báðir leiðararnir hittast. Fyrstu ferð var í marts í fjør – meira enn seks ár eftir, at Kim Jong-un tók yvir valdið frá pápa sínum.

Seinastu tíðina eru fleiri tekn um, at afturlatna stýrið í Norðurkorea er við at lata seg upp. Í juni í fjør var ein søguligur toppfundur í Singapore millum Kim Jong-un og amerikanska forsetan, Donald Trump.

Tá gjørdust teir báðir leiðararnir samdir um at arbeiða fram móti eini kjarnorkuavdubbing av Koreansku Hálvoynni.

Í nýggjársrøðu síni segði norðurkoreanski leiðarin, at hann er til reiðar at hitta Donald Trump aftur. Hann ávaraði samstundis forsetan móti at varðveita búskaparligu revsitiltøkunum móti landinum, skrivar Reuters.