Innanlands

Kristin Michelsen á listanum hjá Sjálvstýri

Fyrrverandi javnaðarmaðurin stillar nú upp fyri Sjálvstýri til komandi løgtingsval

2019-08-17 18:38 Author image
Alda Nielsdóttir

Kristin Michelsen, borgarstjóri í Tvøroyar kommunu, sum í januar varð koyrdur úr Javnaðarflokkinum, stillar nú upp fyri Sjálvstýri til komandi løgtingsval.

Hesum váttar flokkurin í tíðindaskrivi í dag.

- Eg fegnist um at vera á listanum hjá Sjálvstýri, tí eg taki fult undir við teirri linju ið flokkurin hevur lagt gjøgnum longri tíð, har millum annað vinnuni verður tryggjaðir góðar og tryggar karmar, umframt at vit fáa sett sjóneykuna á avbjóðingarnar hjá útjaðrinum í Føroyum - ikki minst í mun til ferðavinnu, sigur Kristin Michelsen, sum eisini metir tað vera neyðugt, at munandi tillagingar vera gjørdar í fiskivinnunýskipanini – eitt nú, so skulu menningarkvoturnar og  uppboðssølan takast av. 

- Fiskivinnan skal fáa nógv tryggari karmar at virkar undir, soleiðis at nýggjar íløgur kunnu gerast. Eisini er neyðugt, at vit hyggja at alivinnuni, ið hevur nógv tryggari karmar, og fáa javnstilla fiski- og alivinnunna. Hví skal fiskivinnan gjalda nógv meir enn alivinnan og liva undir ótryggari kørmum?

Kristin ynskir at virka fyri, at verkætlanir kring landið vera stuðlaðar. Eitt nú vil hann seta fulla ferð á Suðuroyartunnilin, soleiðis at klárt er at bora tá Sandoyartunnilin er liðugur. Harumframt vil hann styrkja um Suðuroyar- og Klaksvíkar Sjúkrahús. Eisini vil hann seta ferð á tunnlarnar norður um fjall og Fámjins tunnilin.

Kristin ynskir at staðseta almenn arbeiðspláss í Eysturoynni og at fáa gjørt Fjøruvegin í Runavík.

- Eysturoyggjin er ein kraftdepil innan vinnulív við nærum ongum almennum arbeiðsplássum, her mugu almennir stovnar staðsetast, og í mesta mun skulu nýggir almennir stovnar staðsetast uttanfyri miðstaðarøkið. Eisini er neyðugt at vit alt fyri eitt fáa sett gongd á Fjøruvegin í Runavík, sigur hann.

placeholder
placeholder