Føroysk tíðindi á enskum: Triðja og seinasta summarútgávan er á gøtuni

Útlendski áhugin fyri Føroyum er voksin sera nógv seinastu árini, og tað sæst aftur hjá Local.fo. Hetta skrivar miðilin, ið hevur tíðindi bæði á heimasíðu og í blaðformi.

Triðja og seinastu útgáva av Local.fo blaðnum fyri í summar er nú komin:

- Seinasta summar høvdu vit eina útgávu til alt summarið, men hetta summarið hevur borið til at prenta tríggjar ymiskar útgávur við ymiskum tilfari - í apríl, juni og í august. Hetta er sjálvandi hugaligt sigur Torleif Joensen, stjóri í Local.fo.

Blaðið verður ikki útgivið alt árið, men tað er á heimasíðuni Local.fo, at tíðindi eru dagliga alt árið. Har eru vitjanartølini longu komin uppá sama støði sum alt 2018:

- Vit byrjaðu virksemið seinasta ár, og tá vóru 220.000 vitjandi alt árið. Nú er talið longu farið uppum tey 220.000, og tað eru 5 mánaðir eftir av árinum, upplýsir Torleif Joensen. 

Local.fo verður komandi dagarnar borið út til flestu støðini kring landið, har ferðafólk halda til.

Seinasta útgávan av Local.fo blaðnum kann lesast her