Løgtingið mintist Heina O. Heinesen

- Dámligi og jarðbundni maðurin við tí smædna smílinum hevur lagt árarnar inn.

Soleiðis byrjaði løgtingsformaðurin minningarløtuna í løgtinginum í dag um Heina O. Heinesen, sum andaðist 13. august

Tá løgtingið kom saman fyri løtu síðani varð byrjað við minningarløtu fyri Heina O. Heinesen, fyrrverandi løgtingsmanni.

Heini í Kunoy, sum hann vanliga varð kallaður, andaðist 13. august 80 ára gamal. Heini varð føddur 6. august 1938 í Kunoy.

Páll á Reynatúgvu, løgtingsformaður, hevði eitt orð í minningarløtuni í tinginum. Løgtingsformaðurin bar millum annað við, at Heini ikki var langa løtu frá at verða longst sitandi borgarstjóri í vesturheiminum. Heini var borgarstjóri í Kunoy frá 1977-2008 og aftur frá 2013.

Heini O. Heinesen var valdur á ting í 1984 og sat á tingi í samfull 23 ár. Hann hevði serligan áhuga fyri økisfriðingum, verju av ungfiski og samferðslu á sjógvi og landi. Heini var formaður í Tjóðveldisflokkinum frá 1994-2000 og var formaður fyri flokkinum á tingi frá 1994-2004.

Løgtingsformaðurin var týðiliga rørdur og hevði trupult við at fáa orðið upp, tá hann at enda bað tingið um at reisa seg og minnast Heina O. Heinesen.