Munnligar próvtøkur í Noregi avlýstar

Norska kenslumálaráðkvinnan, Guri Melby, hevur í dag avlýst allar munnligar próvtøkur, sum skuldu verið hildnar í summar.

Hetta varð upplýst á einum tíðindafundi í Oslo í morgun.

- Júst nú eru fleiri túsund næmingar og fleiri hundrað lærarar í sóttarhaldi, og tað er orsøk at halda, at hetta verður støðan komandi vikuna, segði norsk ráðkvinnan.

Fyri blaðnum VG greiðir hon frá, at avgerðin byggir á smittustøðuna og um tað er ráðiligt at hava munnligar próvtøkur. Skrivligu próvtøkurnar vórðu avlýstar longu í februar.

Avlýstu próvtøkurnar eru galdandi fyri norskar ungdómsskúlar og fyri víðari lestur, svarandi til miðnám.

Kenslumálaráðkvinnan hevur annars hildið uppá í langa tíð, at próvtøkurnar skuldu haldast, hóast smittuvandan. Men í dag varð kósin so broytt.

Hon sigur, at neyðugt var at bíða við avgerðini til nú.

- Vit hava mett um smittustøðuna, og tikið avgerðina út frá hesum, sigur Guri Melby.