NATO hevur bjóðað Makedonia í verjusamgonguna

Limalondini í NATO hittast í hesum døgum í Brússel, og á fundinum varð í gjár avgjørt at bjóða Makedonia við í verjusamgonguna. Limaskapurin er tó treytaður av, at fólkið í landinum góðtekur at eita Lýðveldið Norðurmakedonia.

Orsøkin til treytina er, at Grikkalandi ikki góðtekur, at Makedonia fær limaskap við verandi navni. Grikkaland heldur fast í at Makedonia er eitt staðarnavn, sum hoyrir til eitt øki í norðara parti av Grikkalandi.