Nic.fo heitir á allar brúkarar: - Broytið tykkara loyniorð beinanvegin

Sunnudagin varð heimasíðan hjá FO umsitingini nic.fo álopin av teldusníkum.

Tekniska kanningareindin hjá løgregluni kannar í løtuni málið, og hóast álopið varð steðgað, so verður sagt, at sníkarnir hava fingið fatur í teldupostadressum og loyniorðum hjá øllum brúkarum á nic.fo. Upplýsingar um gjaldskort o.a. eru tó ikki raktir av álopinum, sigur FO umsitingin í tíðindaskrivi.

- Nógv fólk brúka sama loyniorð til ymiskar skipanir, og tí er tað av alstórum týdningi, at fólk broyta síni loyniorð á øðrum skipanum beinavegin fyri at tryggja, at sníkarnir ikki sleppa inn at skaða aðrastaðni, sigur FO umsitingin.

Nic.fo varð sløkt fyri at steðga álopinum og letur uppaftur mánadagin í nýggjari skipan. Øll navnaøki eru sostatt nú í tryggum kørmum og verða ikki ávirkað av hesum, sigur FO umsitingin.

Tá nic.fo letur uppaftur, fáa allir verandi brúkarar ein teldupost við leinki at velja nýtt loyniorð til skipanina.