Saudiarabia bannar part av sjónvarpssending á Netflix

Stroymingartænastan Netflix hevur tikið ein part av sendingini “Patriot Act with Hasan Minhaj” av tænastuni í Saudiarabia, eftir at Saudiarabia klagaði um partin.

Í partinum er Hasan Minhaj sera atfinningarsamur móti Saudiarabia, og kongadømi hevur biðið Netflix um at taka partin av. Grundgevingin er, at parturin “brýtur lógina um lógarbrot á netinum”.

Parturin varð frumsýndur í oktober, eftir at saudiarabiski tíðindamaðurin Jamal Khashoggi varð dripin á saudiarabiska konsulátinum í Istanbul. Hasan Minhaj leggur harðliga út eftir saudiarabisku stjórnini og krúnprinsinum, Mohammed bin Salman.

Parturin sæst á Netflix  á okkara leiðum.