Skjótt kunnu samkyndir menn í Danmark geva blóð

Tað er ikki møguligt hjá samkyndum monnum at geva blóð í Føroyum ella Danmark. Men danski heilsumálaráðharrin, Ellen Trane Nørby frá Vinstra flokkinum, sigur við DR.dk at hettar verður broytt næsta ár. 

Tað er ótti fyri HIV smittuni, sum hevur verið grundgeving fyri, at samkyndir menn ikki kunnu geva blóð. Og hóast ætlanin er at javnstilla samkyndar menn í rættinum at geva blóð, verður hettar ikki heilt gjørt. Tí ætlanin er at seta sum krav til samkyndar menn, sum vilja geva blóð, at teir ikki hava havt samløgu í fýra mánaðir ella at teir liva í einum føstum parlagi.