Skottilburður á jólamarknaði í Strasbourg

Franska løgreglan er í hægstu tilbúgving í býnum Strasbourg eftir ein skottilburð nærhendis einum jólamarknaði.

Íbúgvar verða bidnir um at halda seg innandura, og at halda seg burtur frá miðbýnum, skriva útlendskir miðlar.

Lokalu myndugleikarnir upplýsa, at í minsta lagið ein persónur hevur latið lív og tíggju eru særd.

Løgreglan leitar eftir einum gerningsmanni, sum hevur skotið í tveimum ymsum støðum í miðbýnum í Strasbourg. Fyrst á jólamarknaðinum og eftir tað nærhendis.

Hildið verður, at talan er bara um ein gerningsmann, og hann er sloppin til rýmingar. Sambært Danmarks Radio veit løgreglan hvør gerningsmaðurin er.