So var ljós aftur í Klaksvík

Vøllurin við Djúpumýru í Klaksvík og øki umkring eru fyri nógvum og umfatandi broytingum fyri tíðina - hetta er alt ein liður í at altjóðagerða fótbóltsvøllin og kringumstøðurnar. Broytingar hava verið við áskoðaraskýli, girðingarnar við síðulinjurnar eru tiknir burtur ella fluttar, Bláa Skýið undir liðuni á KÍ-høllini er í gerð, eisini nýggj útskiftingarskýli, og í summar er nýggja graslíki lagt á.

Í tí sambandi eru nýggju ljósmastrarnar settar upp í hornunum. Tær eru høgar, og lýsa væl betri enn tær undanfarnu. Í gjárkvøldið, beint eftir klokkan 23, lýstu ljósmastrarnar fyri fyrstu ferð, og ljósmátingar vórðu gjørdar.

(Soleiðis sá út uppi á "plenuni" seint í gjárkvøldið - Mynd: Jóhan Nolsøe)

Vit frætta úr Klaksvík, at ljósini riggaðu sum tey skuldu. Formaðurin í KÍ, Tummas Lervig, sigur, at á øllum økjum kláraðu tey ásetta kravið. Tað skulu tó gerast onkrar smávegis justeringar. 

Kvinnurnar hjá KÍ og HB spæla í annaðkvøld, og um neyðugt er verður tendrað tá. Tummas Lervig sigur, at annars er næsti kvøldardystur hjá KÍ á Summarfestivalinum, og tá verða ljósini brúkt, og møguliga verður okkurt gjørt burturúr tá.