Talið á deyðum nú farið uppum 100

Talið á persónum, sum hava latið lív í stríðnum millum ísraelar og palestinar seinastu dagarnar er nú komið uppum 100.

Talið á persónum, sum hava latið lív í ísaelsku loftálopunum í Gazageiranum er komið upp á 113. Millum teirra eru í minsta lagi 27 børn og 11 kvinnur. Í minsta lagi 580 afturat eru særd, skrivar DR.

Á ísraelskari síðuni hava higartil sjey latið lív. Millum teirra er ein fimm ára gamal drongur.

Men tað eru ikki bara ísraelski herurin og Hamas, sum stríðast móti hvørjum øðrum. Á gøtunum Í Ísrael eru eisini sivilfólk farin at leypa á hvønnannan. Seinastu dagarnar hava harðligir samanbrestir verið millum jødar og arabarar.

Ísraelski forsætisráðharrin, Benjamin Netanyahu hevur fordømt harðskapin, og er einki, sum rættvísger hendan atburðin, sigur hann.