Teistin verður sleipaður av Brimli

Teistin hevur ligið uppsteðgaður í Skopunarfirði í meir enn ein tíma og bíðar nú eftir at verða sleipaður í land av Brimil.

Orsøkin til hví Teistin steðgaði upp er ikki greið enn. Roynt varð at loysa trupulleikan umborð, men tað sær út til ikki at hava eydnast. 

- Teistin er uttan framdrift í Skopunarfirði, men tamarhald er á støðuni, sigur Strandferðslan á heimasíðuni. 

35 fólk eru umborð á skipinum, upplýsir stjórin á SSL, Hilmar Eliasen, sum ikki hevur aðra kunning enn. 

Av tí sama verða avlýsingar á Skopunar- og Hestleiðini í dag. Nærri kunning um sigling á leiðini verður løgd út á heimasíðuna hjá SSL, so skjótt sum kunningin er tøk, sigur Strandferðslan.