Uttanlands

Týskland: Flogferðslan órógvað av verkfalli

Verkfallið hjá trygdarstarvsfólkum á trimum týskum floghavnum er orsøkin til, at fleiri enn 600 fráferðir eru avlýstar

Mynd: EPA

Mynd: EPA

2019-01-10 10:56 Author image
Alda Nielsdóttir

Fleiri enn 600 fráferðir eru avlýstar í Týsklandi orsakað av eindagsverkfalli hjá trygdarstarvsfólkunum á trimum týskum floghavnum í Düsseldorf, Köln-Bonn og Stuttgart.

Aðrar floghavnir eru eisini ávirkaðar av verkfallinum, m.a. eru 90 fráferðir avlýstar á Tegel floghavnini í Berlin, og altjóða floghavnini í München hevur eisini avlýst 100 fráferðir.

Sambært tíðindastovuni AP verður mett, at upp til 110.000 ferðafólk eru ávirkað av verkfallinum.

Fakfelagið hjá trygdarstarvsfólkunum krevur, at tímalønin verður hækkað til 20 evrur, og í summum førum merkir hetta ein lønarhækking á 30 prosent.

Næsti samráðingarfundurin verður 23. januar.

Hetta er 2. ferð hesa vikuna, at trygdarstarvsfólk faru í verkfall. Mánadagin rýmdu trygdarfólkini hjá tveimum floghavnum í Berlin av arbeiðsplássinum.

placeholder
placeholder