Uttanlands

Vilja hava nýval

Við íblástri frá "Gulu vestunum" í Fraklandi fóru bretar á gøtuna í London at krevja nýval

Mynd: EPA

Mynd: EPA

2019-01-12 21:02 Author image
Alda Nielsdóttir

Seinnapartin í dag savnaðist ein rúgva av mótmælisfólkum í miðbýnum í London.

Mótmælisfólkini, harímillum politikkarar og fakfelagsleiðarar, krevja nýval í Bretlandi.

Umframt Brexit snúði mótmælið seg eisini um fíggjarliga ójavnan, sum sambært fyriskiparunum hevur klívt Bretland í tvey.

- Vit hava eina stjórn, sum einki kennir til tann óttan, sum nógvir bretar verða órógvaðir av dagliga, sigur Steve Turner úr fakfelagnum Unite sambært DR.

- Síðan tey konservativu fingu valdið, er talið av heimleysum tvífaldað, sigur hann.

Sambært fyriskiparum møttu eini 5.000-10.000 fólk upp til mótmælistiltakið.

Fleiri mótmælisfólk høvdu fingið íblástur úr Fraklandi og vóru í gulum vestum.

Í minsta lagi tveir franskir forsprákarar vóru eisini møttir upp til tiltakið at stuðla bretum.

- Eg vildi mett, at "Gulu vestarnir" í Fraklandi er líka sum tann rørslan, ið er við at koma fram í Onglandi. Fólk hava fingið nokk av fátækradømi, órættvísi og sosialum og fíggjarligum órættvísi," sigur ein teirra við tíðindastovuna AFP.

placeholder
placeholder