Alda Nielsdóttir
Týskland, Frakland og Stórabretland heita á Ísrael og Hamas um at taka uppaftur vápnahvíldina alt fyri eitt.
Tað framgongur í felags fráboðan frá týska uttanríkismálaráðharranum Annalena Baerbock, franska uttanríkismálaráðharranum Jean-Noel Barrot og bretska uttanríkismálaráðharranum David Lammy.
Tað at Ísrael aftur er byrjað at leypa á mál í Gaza er eitt "dramatiskt afturstig fyri fólkið í Gaza, gíslarnar, familjur teirra, og alt økið", siga teir.
Heitt verður á "allar partar um at taka uppaftur samráðingarnar og tryggja, at vápnahvíldin verður gjøgnumførd og verður varandi".
Heitt verður eisini á Hamas um at leyslata allar gíslar, sum eftir eru í Gaza, og at hernaðarliga rørslan hvørki skal stýra Gaza ella vera ein hóttan móti Ísrael. Eisini verður heitt á Ísrael um at virða altjóða lóg fullkomiliga og loyva neyðhjálp at koma inn í Gaza, skrivar Ritzau.
Fráboðanin kemur, eftir at ísraelski verjumálaráðharrin, Israel Katz, hótti við at taka meira landøki í Gaza, um fleiri gíslar ikki vórðu leyslatnir av Hamas.
Fyrsta stig av vápnahvíldini, sum byrjaði 19. januar, endaði 1. mars.
Les eisini: Ísrael hóttir við at taka meira landøki í Gaza
Vinarliga broyt tínar kennifíla - og privatlívsstillingar fyri at síggja hetta innihald