Kalt í kvøld og stormur um vikuskiftið

Veturin byrjar nú at vísa seg á okkara leiðum. Í dag merkist kuldin, og fjøllini eru hvít oman móti garðunum.

Hetta veðrið við høgættarkulda heldur fram í kvøld og í nátt. Sambært DMI skal roknast við fitt av vindi av útnyðringi og norði og kulda heilt niður móti frostmarkinum.

Í morgin minkar vindurin aftur og tað gerst nakað lýggjari.

Men um vikuskiftið fer eitt nýtt lágtrýst at ávirka veðrið á okkara leiðum.

Fríggjakvøldið kann roknast við stormi ella kolandi stormi við vindi upp í 30 metrar um sekundið úr útsynningi. Leygardagin verður eisini nógvur vindur at útsynningi og vestri og ávarað verður um hvirlur upp í ódnarstyrki, 35 metrar um sekundið.