Margreta drotning sloppin úr sóttarhaldinum

Margreta drotning, sum fyrst í farnu viku fekk staðfest koronu, er nú sloppin úr sóttarhaldinum, boðar kongshúsið frá.

Meðan drotningin hevur verið avbyrgd á Fredensborg slottinum, hava tiltøk, sum hon skuldi luttikið í, verið avlýst, og krúnprinshjúnini hava eisini verið vertir fyri fleiri galladøgurðar í hennara stað.

Nú drotningin er sloppin úr sóttarhaldinum, fer hon beinleiðis til Oslo, har hon í kvøld skal taka ímóti norðurlendskari málvirðisløn og luttaka í galladøgurða.

Talan er um virðislønina Nordens språkpris, sum Norrøna Felagið, Foreningen Norden, í Noregi hevur latið síðan 2010. Virðislønin verður givin fyri at heiðra persónum og stovnum, sum eru við til at økja um málfatanina tvørtur um landamørk í Norðurlondum.

Margeta drotning fær viðislønina, sum verður handað av norsku Sonju drotning, fyri at vera ein týðandi rødd fyri norðurlendskt samstarv, felagsskap og mál. M.a. hevur drotningin heitt á ung í Norðurlondum um at brúka skandinavisk mál, tá tey tosa saman.

Sambært Ritzau tosar Margreta drotning, umframt dansk, fýra mál. Talan er um franskt, svenskt, enskt, og týskt.