Alda Nielsdóttir
Løgreglan í Oslo hevur kannað, um norska krúnprinsessan, Mette-Marit kann verða avhoyrd í sambandi við málið móti soni hennara, Marius Borg Høiby.
27 ára gamli Marius Borg Høiby varð handtikin 4. august og skuldsettur fyri harðskapi móti táverandi unnustuni. Síðani er hann eisini skuldsettur fyri at hava brúkt harðskap móti tveimum øðrum kvinnum.
Tað er sakførarin hjá einu kvinnuni, sum hevur biðið løgregluna um at innkalla krúnprinsessuna til avhoyringar, skrivar Ritzau.
Tí hava løgfrøðingar hjá norsku løgregluni kannað, hvørjar avmarkingar eru í norsku grundlógini í mun til kanningar av málum, sum hava samband við limir av norska kongshúsinum.
Hvørja niðurstøðu løgreglan er komin til, hevur løgreglan ikki upplýst.
Marius Borg Høiby er sonur Mette-Marit krúnprinsessu, men hann er ikki formliga partur av kongshúsinum, av tí at Mette-Marit fekk hann, áðrenn hon giftist Haakon krúnprinsi.
Vinarliga broyt tínar kennifíla - og privatlívsstillingar fyri at síggja hetta innihald