Rakul vann 40.000 krónur fyri ritgerð

Rakul Skaale Andreassen hevði besta íkastið úr Føroyum í danskari ritgerðarkapping. Hon vann í dag heiður og 40.000 krónur fyri sína MA-ritgerð, sum hon gjørdi á Føroyamálsdeildini fyrr í ár 

Hvønn hugburð hava vit til føroyskt, danskt og enskt mál? Og standa vit fyri einum málskifti, nú vit í heilum hoyra børn og ung tosa við enskum orðum?

Hetta setti Rakul Skaale Andreassen sær fyri at kanna, tá hon fór undir sína MA-ritgerð á Føroyamálsdeildini á Setrinum.

Kanningarnar vístu, at gamaní verða tey ungu ávirkað av enskum, men kortini eru útlitini ikki so døpur.

- Jú, eg eri optimistisk um málsligu framtíðina, tí kanningarnar hjá mær vísa, at tey ungu virðismeta føroyskt, og at tey vilja halda fast í tí føroyska, segði hon m.a., tá hon vardi sína ritgerð í Kongshøll í summar.

Og í dag vann Rakul Skaale Andreassen føroyska partin í ritgerðarkappingini, sum danska Undirvísingar- og Granskingarmálaráðið hevur skipað fyri í londunum í ríkisfelagsskapinum.