Seksualupplýsing farin í gongd á miðnámsskúlunum

Elin og Óluva byrjaðu í Suðuroy, har tær undirvístu tveimum flokkum. Hesa vikuna hava tær verið á Miðnámi á Kambsdali.

- Næmingarnir vísa stóran áhuga í evninum, og tað er heilt víst sera kærkomið at fáa dagførda vitan um evnið í hesum aldursbólkinum. Evnini, sum undirvíst verður um, eru bæði innan fyribyrging, kynssjúkur, seksualitet, at seta mørk, samtykki, ymsikleika osfr.

Heilsufrøðingar eru inni í øllum fólkaskúlum í Føroyum, har tað verður kunnað um mørk, kynsbúning, fyribyrging og seksualitet á teirra støði. Tað er ein nátúrlig gongd, at heilsufrøðingar eisini eru á miðnámi og arbeiða bæði heilsufremjandi og fyribyrgjandi. Eftir ynski frá Djóna N. Joensen, landsstýrismanni í Barna- og útbúgvingarmálum, verður í fyrstu atløgu lagdur dentur á seksualupplýsing, harundir kynsliga heilsu og fyribyrging, at seta mørk, samtykki o.ø.

- Vit í Gigni vóna, at tænastan við tíðini kann víðkast til eisini at fevna um onnur viðurskiftir, sum fremja kropsliga og sálarliga heilsu hjá teimum ungu. Sum dømi kann nevnast, at heilsufrøðingar í Norra hava somu normering á miðnámsskúlaøkinum, sum vit hava á fólkaskúlaøkinum. Tey ungu í Norra eru ógvuliga glað fyri hendan møguleikan, og tilboðið verður nógv brúkt.

Tað er ein stórur fyrimunur, at tað eru teir somu heilsufrøðingarnir. Sambært teimum hevur tikið verið væl ímóti teimum, og næmingarnir fáa góðar møguleikar at samskifta um seksuell evni.

Elin og Óluva hava saman við leiðsluni í Gigni verið í Norra og Danmark á kanningarferð og sæð, hvussu heilsufrøðingarnir arbeiða har.

Enn eru fleiri flokkar á Kambsdali, sum mangla hesa seksualupplýsing. Eftir Kambsdal verður farið til miðnám í Klaksvík og Vestmanna og síðani til Glasir.

Á gigni.fo kann meira lesast um upplýsingina