Seyður úr skorunum á uppboðssølu

Í sambandi við Vestmannadagarnar, sum eru hesa vikuna, var seinnapartin uppboðssøla við trimum veðrum. 

Veðrarnir hava gingið í Góðmanskor. Tveir vóru seldir livandi, meðan hin triði varð seldur sundurlimaður.

Nógv fólk var komið saman til tiltakið, sum var á Heygum í Vestmanna. Samlaða sølan var 27.000 krónur. Tann eini veðrurin var seldur fyri 6.000 krónur, og hin fyri 7.500 krónur. Av tí sundurlimaða fór eitt tjógv fyri 3.000 krónur.

Stóra brakið á Vestmannadøgunum verður í kvøld, tá konserttiltakið “Rokkur í Vestmanna” er á skrá.

Á pallinum vera Deiggj, Hamradun, MC-Hár og Brim, og íslendsku Pink Floyd tulkararnir Dúndurfréttir.