Skottilburður á universiteti í Florida

Hóskvøldið okkara tíð varð ein persónur handtikin í sambandi við ein skottilburð á einum universiteti í amerikanska statinum Florida.

Sambært NBC News lótu tvey fólk lív, og seks onnur vórðu særd. Upplýst verður tó ikki, hvussu álvarsliga løstað hesi seks fólkini eru.

Hetta hendi á Florida State University í býnum Tallahassee.

Trý skotvápn eru funnin í sambandi við hendingina.  Persónurin, sum er undir illgruna fyri at standa aftanfyri, er 20 ár og lesandi á universitetinum.

Viðkomandi er sonur einum løgreglufólki. Hann hevði atgongd til eitt vápn, sum fyrr hevur verið brúkt av løgregluni, og eisini skal hann hava luttikið í løgregluvenjingum. Hann varð raktur av skotum frá løgregluni á staðnum.

Sambært løgregluni vóru tey bæði, sum lótu lív, ikki lesandi.

Hetta er ikki fyrstu ferð, at Florida State University verður rakt av einum skottilburði. Í 2014 vórðu trý fólk særd - tvey lesandi og eitt starvsfólk - tá ein fyrrverandi lesandi lat skot av á høvuðsbókasavninum á universitetinum.

Florida State University upplýsir, at alt virksemi er avlýst í dag.