Tosaði til fólkið fyri fyrstu ferð sum kongur

- Lyftið sum hon gav, um at tæna landunum alt hennara lív, gevi eg eisini, segði Charles kongur í røðu fyri løtu síðani. Hetta er fyrsta røðan, hann hevur hildið sum kongur av Bretlandi.

Í taluni vóru nógv vøkur orð um mammu hansara, Elizabeth drotning, sum doyði í gjárkvøldið, 96 ára gomul.

- Alt hennara lív, var hennara hátign, Elizabeth drotning, elskaða móðir, til stóran íblástur og fyrimynd fyri alla familjuna, segði Charles kongur.

- Vit skylda henni so nógv, sum ein familja yvirhøvur kann skylda sínari móðir, fyi hennara kærleika, trúfesti og vegleiðing, segði nýggi kongurin í Bretlandi.

Talan varð tikin upp seinnapartin í Blue Drawning Room á Buckingham Palace í London.

Charles kongur var til staðar á Balmoral slottinum í Skotlandi, har Elisabeth drotning doyði í gjárkvøldið, men er í dag komin til London.