Innanlands

Viðgera nú parkinson-sjúklingar við serligari pumpu

Duodopa: Landssjúkrahúsið farið undir nýtt slag av viðgerð til sjúklingar við serligum motoriskum avbjóðingum orsaka av parkinson

2019-11-22 15:52 Author image
Tíðindaskriv
placeholder

Mánadagin byrjaðu fyrstu sjúklingarnir í Føroyum viðgerð móti parkinson við pumpu, eisini nevnd Duodopaviðgerð. Duodopapumpan tryggjar ein javnan streym av flótandi levodopa, ið er heilivágur, sum hevur víst seg at muna væl hjá sjúklingum við motoriskum avbjóðingum orsakað av parkinson sjúku.

Viðgerðin verður givin gjøgnum sondu. Byrjað verður við nasalsondu, meðan rætta nøgdin av heilivágnum verður funnin. Síðani verður PEG-J sonda løgd, har framhaldandi viðgerðin við medisinpumpu verður sett til. Pumpan ger, at heilivágurin verður givin leypandi við at pumpa heilivágin beinleiðis inn í buggørnini  umvegis eina sondu. Hetta hevur við sær, at sjúklingurin upplivir eina betri javnvág í kroppinum í mun til ristingar og stívleika, sum eyðkenna parkinson sjúku.

Pumpan kann havast í einum belti, einum vesti ella í einum snóri um hálsin. Sondan verður verandi í tarmunum, men sjálv pumpan kann takast av um náttina. Sondan verður løgd inn undir lokaldoyving, og síðani skal sjúklingurin vera innlagdur í eitt samdøgur. Eftir innleggjan av sonduni, verður sondan og pumpan tillagað av starvsfólkunum á deildini, og tilsamans kann sjúklingurin vænta at vera innlagdur í eina lítla viku fyri at fáa viðgerðina setta til.

Viðgerðin er ætlað parkinson sjúklingum við serliga ógvisligum motoriskum avbjóðingum, og flestu sjúklingar hava ikki tørv á øðrum heilivági móti parkinson sjúku, tá tey nýta pumpuna.

Kristian Winge, neurologur og serkønur innan parkinson sjúku, stendur fyri viðgerðini í Føroyum. Á B7 eru tveir sjúkrarøktarfrøðingar, ið hava ábyrgd av viðgerðini, og hava tær fingið undirvísing frá donskum sjúkrarøktarfrøðingi við servitan á økinum.

Kelda: Landssjúkrahúsið á netinum

 

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder