Byggja fimm íbúðir á Steig í Sandavági

Á ársins seinasta býráðsfundi hjá Vága kommunu, varð rammuavtala viðvíkjandi íbúðarbygging í Sandavági, millum Bústaðir og Vága kommunu, samtykt.

Seinasta árið, hava samráðingar verið millum Bústaðir og Vága kommunu, um at byggja íbúðir á Steig í Sandavági. Nógv virksemi hevur verið í býráðnum og í umsitingini, og er endaliga samtytk at taka av upprunatilboðnum um at byggja fimm íbúðir. 

Við at undirskriva rammuavtaluna bindir Vága kommuna seg til at rinda fyri liðugtgerð av byggibúningi av matr. nr. 4y.

Tað er West Tec í Sørvági, ið hevur staði fyri prosjekteringini av økinum. 

- Tað hevur ligið í kortunum í longri tíð at Bústaðir skulu byggja íbúðir í kommununi, og gleðast vit um at avtalan er undirskrivað og at arbeiðið kann byrja fyrst í komandi ári, skrivar kommunan í tíðindaskrivi.